Pakistan İslam Respublikası
Azərbaycan Respublikası ilə Pakistan İslam Respublikası arasında ikitərəfli münasibətlər
Azərbaycan Respublikasının müstəqilliyini ilk tanıyan dövlətlərdən biri Pakistan İslam Respublikası olmuşdur (12 dekabr 1991-ci il). İki ölkə arasında diplomatik əlaqələr 9 iyun 1992-ci ildə qurulmuşdur. Pakistan İslam Respublikasının Bakıda səfirliyi 12 mart 1993-cü ildə, Azərbaycan Respublikasının İslamabadda səfirliyi 24 avqust 1997-ci ildə təsis edilmişdir.
Pakistan İslam Respublikası Azərbaycanın suverenliyini və beynəlxalq səviyyədə tanınmış sərhədləri çərçivəsində ərazi bütövlüyünü dəstəkləyir, Ermənistanın təcavüzünü daim pisləmişdir. Pakistan İslam Respublikası işğalçı Ermənistanı rəsmən tanımamış və bu ölkə ilə diplomatik əlaqələr qurmamışdır. 2012-ci ildə Pakistan Senatının Xarici Əlaqələr Komitəsi, 2017-ci ildə Milli Assambleyanın Xarici İşlər Komitəsi Xocalı Soyqırımını tanıyan və Ermənistanın Azərbaycana qarşı təcavüzünü pisləyən qətnamələr qəbul etmişdir. Pakistan, həmçinin İkinci Qarabağ müharibəsində Azərbaycanla həmrəylik nümayiş etdirmişdir. 2020-ci ilin oktyabr ayında Pakistan Milli Assambleyası Azərbaycan Respublikasının Dağlıq Qarabağ bölgəsində Ermənistanın təcavüzünü pisləyən qətnaməni yekdilliklə qəbul etmişdir. Pakistan Senatında Kabinet Katibliyi üzrə daimi komitə tərəfindən Azərbaycana qarşı Ermənistanın təcavüzünü pisləyən və ölkəmizə dəstək ifadə edən qətnamə yekdilliklə qəbul edilmişdir.
Azərbaycan Respublikası Pakistan İslam Respublikası ilə münasibətlərə xüsusi əhəmiyyət verir və bu əlaqələrin bütün sahələr üzrə genişləndirilməsində maraqlıdır.
İki ölkə arasında humanitar sahədə əlaqələrin inkişafında Heydər Əliyev Fondunun xüsusi rolu vardır. 2015-ci ildə Azərbaycanın birinci xanımı, Heydər Əliyev Fondunun prezidenti Mehriban xanım Əliyeva “Hilal-e Pakistan” ordeni ilə təltif edilmişdir.
28 fevral-1 mart 2017-ci ildə Azərbaycan Respublikasının Prezidenti İlham Əliyev Pakistana səfər etmişdir (İqtisadi Əməkdaşlıq Təşkilatının 13-cü Zirvə Toplantısı çərçivəsində).
25-26 oktyabr 2019-cu ildə Pakistan İslam Respublikasının Prezidenti Arif Alvi Azərbaycana səfər etmişdir (Qoşulmama Hərəkatının 18-ci Zirvə Toplantısı çərçivəsində).
30 noyabr-1 dekabr 2017-ci ildə Pakistan İslam Respublikasının xarici işlər naziri Xavaca Məhəmməd Asif Azərbaycana səfər etmişdir (Azərbaycan-Pakistan-Türkiyə xarici işlər nazirlərinin 1-ci Üçtərəfli Görüşü və “Asiyanın ürəyi-İstanbul Prosesi”nin 7-ci Nazirlər Toplantısı çərçivəsində).
13-14 yanvar 2021-ci ildə Azərbaycan Respublikasının xarici işlər naziri Ceyhun Bayramov Pakistana rəsmi səfər etmişdir (Azərbaycan-Pakistan-Türkiyə xarici işlər nazirlərinin 2-ci Üçtərəfli Görüşü).
Parlamentlərarası əlaqələr
Azərbaycan Respublikasının Milli Məclisində Azərbaycan-Pakistan parlamentlərarası əlaqələr üzrə işçi qrupu fəaliyyət göstərir. Qrupun rəhbəri Qənirə Paşayevadır.
Pakistan İslam Respublikasının Milli Assambleyasında Pakistan-Azərbaycan parlamentlərarası dostluq qrupu fəaliyyət göstərir. Qrupun rəhbəri Əsəd Qeysərdir.
Senatda Pakistan-Azərbaycan parlamentlərarası dostluq qrupunun rəhbəri Muhammad Talha Mahmuddur.
Müqavilə hüquq bazası
Azərbaycan Respublikası ilə Pakistan İslam Respublikası arasında 36 sənəd imzalanmışdır.
İqtisadi sahədə əməkdaşlıq
Azərbaycan ilə Pakistan arasında ticarət sahəsində əməkdaşlıq üzrə və kənd təsərrüfatı sahəsində Birgə İşçi Qrupları fəaliyyət göstərir.
Azərbaycan ilə Pakistan arasında ticarət dövriyyəsi (milyon ABŞ dolları)
|
İl |
İxrac |
İdxal |
Ümumi ticarət dövriyyəsi |
|
2016 |
1.43 |
5.86 |
7,29 |
|
2017 |
1,83 |
6,42 |
8,25 |
|
2018 |
0,37 |
25,43 |
25,8 |
|
2019 |
0,3 |
14,5 |
14,8 |
|
2020 |
1,7 |
11,6 |
13,3 |
Azərbaycandan Pakistana ixrac: şirələr, müxtəlif sular.
Azərbaycana Pakistandan idxal: düyü, ərzaq məhsulları, tekstil və digər məhsullar.
Diplomatik Nümayəndəlik
Azərbaycan Respublikasının Pakistan İslam Respublikasındakı Səfirliyinin ünvanı:
Islamabad, G-5, Diplomatic Enclave II, Plots 10/1 E
Səfirliyin internet səhifəsi: www.islamabad.mfa.gov.az
TEL: +92512600704
FAX: +92512600720,+92512600707