AZƏRBAYCAN RESPUBLİKASI XARİCİ İŞLƏR NAZİRLİYİ

Çin Xalq Respublikası Azərbaycan Respublikasının müstəqilliyini 27 dekabr 1991-ci ildə tanımış, iki ölkə arasında diplomatik əlaqələr isə 2 aprel 1992-ci ildə qurulmuşdur.

1992-ci ilin avqust ayında Çin Xalq Respublikasının Azərbaycan Respublikasındakı Səfirliyi, 3 sentyabr 1993-cü ildə isə Azərbaycan Respublikasının Çin Xalq Respublikasındakı Səfirliyi təsis edilmişdir.

Azərbaycan Respublikası Prezidentinin 29 avqust 2023-cü il tarixli Sərəncamı ilə Bünyad Hüseynov Azərbaycan Respublikasının Çin Xalq Respublikasında Fövqəladə və Səlahiyyətli Səfiri təyin edilmişdir.

Çin Xalq Respublikasının Azərbaycan Respublikasındakı Fövqəladə və Səlahiyyətli Səfiri Lu Mey 17 aprel 2025-ci ildə etimadnaməsini Azərbaycan Respublikasının Prezidentinə təqdim etmişdir.

Azərbaycan Respublikası Çin Xalq Respublikası ilə ikitərəfli münasibətlərə xüsusi əhəmiyyət verir və bu əlaqələrin bütün sahələr üzrə daha da genişləndirilməsində maraqlıdır.

İki ölkənin dövlət başçıları səviyyəsində təşəkkül tapmış, qarşılıqlı etimada və dostluğa əsaslanan münasibətlər siyasi, iqtisadi, hərbi, humanitar, mədəni və digər sahələrdə müşahidə olunan hazırkı yüksək inkişaf dinamikasının əsasını təşkil edir.

İki ölkə arasında mövcud fəal siyasi dialoq nəticəsində energetika, ticarət-iqtisadi, rabitə-kommunikasiya, nəqliyyat-logistika, turizm və humanitar sahələrdə mühüm nailiyyətlər əldə olunmaqdadır.

2013-cü ildə Çin Xalq Respublikası tərəfindən irəli sürülmüş “Bir Kəmər, Bir Yol” təşəbbüsü ikitərəfli münasibətlərimizin dərinləşməsi üçün yeni imkanlar yaratmışdır. “Bir Kəmər, Bir Yol” təşəbbüsünü ilk dəstəkləyən ölkələrdən biri olan Azərbaycan həyata keçirdiyi irimiqyaslı nəqliyyat-infrastruktur layihələri ilə bu təşəbbüsün reallaşdırılmasına mühüm töhfə verməkdədir.

Azərbaycan Respublikasının Prezidenti cənab İlham Əliyevin 22–24 aprel 2025-ci il tarixlərində Çin Xalq Respublikasına dövlət səfəri çərçivəsində “Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat” imzalanmışdır.

Diplomatik nümayəndəliklərin rəhbərləri barədə məlumat

Dövlət başçısı	Səfərin xarakteri	Tarix
Heydər Əliyev	Rəsmi səfər	7–10 mart 1994-cü il
İlham Əliyev	Rəsmi səfər	17–19 mart 2005-ci il
İlham Əliyev	XXIX Yay Olimpiya Oyunlarının Pekində keçirilən açılış mərasimində iştirak	8 avqust 2008-ci il
İlham Əliyev	Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) IV Zirvə toplantısında iştirak	20–21 may 2014-cü il
İlham Əliyev	Dövlət səfəri	8–11 dekabr 2015-ci il
İlham Əliyev	Beynəlxalq Əməkdaşlıq üzrə II “Bir Kəmər, Bir Yol” Forumunda iştirak	24–27 aprel 2019-cu il
İlham Əliyev	Dövlət səfəri	22–24 aprel 2025-ci il
İlham Əliyev	“ŞƏT Plyus” formatında Zirvə toplantısında, həmçinin Çin xalqının Yaponiya təcavüzünə qarşı Müqavimət Müharibəsində və Dünya Antifaşist Müharibəsində Qələbənin 80 illiyi münasibətilə keçirilən tədbirlərdə və hərbi paradda iştirak	30 avqust – 3 sentyabr 2025-ci il

Xarici işlər nazirlərinin səfərləri

Azərbaycan Respublikası Xarici İşlər Nazirlərinin Çin Xalq Respublikasına səfərləri

Nazir	Tarix
Həsən Həsənov	yanvar 1994-cü il
Vilayət Quliyev	oktyabr 2000-ci il
Elmar Məmmədyarov	fevral 2005-ci il
Elmar Məmmədyarov	30 iyun – 2 iyul 2014-cü il
Elmar Məmmədyarov	14 mart 2016-cı il
Elmar Məmmədyarov	17–21 sentyabr 2018-ci il
Ceyhun Bayramov	27–28 yanvar 2026-cı il

Çin Xalq Respublikası Xarici İşlər Nazirlərinin Azərbaycan Respublikasına səfərləri

Nazir	Tarix
Tsyan Tsiçen	aprel 1996-cı il
Li Caosin	oktyabr 2004-cü il
Yanq Cieçi	17–19 may 2010-cu il
Van İ	22–23 may 2019-cu il

Parlamentlərarası əlaqələr

Azərbaycan Respublikası Milli Məclisinin Sədrlərinin Çin Xalq Respublikasına səfərləri

Milli Məclisin Sədri	Tarix
Murtuz Ələsgərov	1 dekabr 1996-cı il
Murtuz Ələsgərov	2 aprel 2002-ci il
Oqtay Əsədov	19–23 iyun 2018-ci il
Sahibə Qafarova	26 mart 2026-cı il

Ümumçin Xalq Nümayəndələri Yığıncağı Daimi Komitəsinin Sədrlərinin Azərbaycan Respublikasına səfərləri

Daimi Komitənin Sədri

Tarix

Li Pen

iyun 2000-ci il

Li Canşu

19–21 sentyabr 2019-cu il

Dostluq qrupları

Azərbaycan Respublikası Milli Məclisində Azərbaycan–Çin parlamentlərarası əlaqələr üzrə işçi qrupunun rəhbəri Soltan Məmmədovdur.

Ümumçin Xalq Nümayəndələri Yığıncağında Çin–Azərbaycan parlamentlərarası əlaqələr üzrə işçi qrupuna Xarici Əlaqələr Komitəsinin sədri Lou Tsincyan (Lou Qinjian) rəhbərlik edir.

Müqavilə-hüquq bazası

Azərbaycan Respublikası ilə Çin Xalq Respublikası arasında müqavilə-hüquq bazası 119 sənəddən ibarətdir.

İqtisadi sahədə əməkdaşlıq

Azərbaycan Respublikası ilə Çin Xalq Respublikası arasında iqtisadi əməkdaşlıq ticarət, energetika, nəqliyyat-logistika, rabitə-kommunikasiya və digər sahələri əhatə edir. Hazırda iki ölkə arasında müxtəlif sahələri əhatə edən 50-yə yaxın birgə layihə həyata keçirilir.

İki ölkə arasında ticarət dövriyyəsi, ixrac və idxalın həcmi (mln ABŞ dolları)

İl	Ticarət dövriyyəsi	İxrac	İdxal
2023	3101	79	3022
2024	3744	20	3725
2025	4874	84	4790

2024-cü illə müqayisədə 2025-ci ildə Çin Xalq Respublikası ilə ticarət dövriyyəsi 30,16 faiz, o cümlədən idxal 28,58 faiz artmış, ixrac isə 4,28 dəfə artmışdır.

İdxalın artımı əsasən yerüstü nəqliyyat vasitələri və onların hissələri (əsasən minik avtomobilləri), qızıl, paltar və geyim ləvazimatları, habelə digər məhsulların idxalının artması ilə bağlıdır.

İxracın artımı isə əsasən neft koksu, ilkin formada polietilen, mexanizmlər, elektrotexniki avadanlıq və onların hissələri, habelə digər məhsulların ixracının artması hesabına baş vermişdir.

Azərbaycan Respublikasının Çin Xalq Respublikasındakı Səfirliyinin ünvanı və əlaqə məlumatları

Ünvan: No. 5 Liangmaqiao Middle Street, Beijing 100600, China
Telefon: (+86 10) 6532 4614; (+86 10) 6532 4698
Faks: (+86 10) 6532 4615
Elektron poçt: mailbox@azerbembassy.org.cn; pekin@mission.mfa.gov.az

Paylaş