No:178/26, Nazir Ceyhun Bayramovun BMT-nin Baş katibinin müavini və Asiya və Sakit okean üzrə İqtisadi və Sosial Komissiyasının icraçı katibi Armida Salsiah Alişahbana ilə görüşünə dair mətbuat məlumatı
20 aprel 2026 16:32
20 aprel 2026-cı il tarixində Azərbaycan Respublikasının xarici işlər naziri Ceyhun Bayramov Banqkok şəhərində keçirilən BMT-nin Asiya və Sakit okean üçün İqtisadi və Sosial Komissiyasının (UNESCAP) 82-ci sessiyası çərçivəsində BMT-nin Baş katibinin müavini və UNESCAP-ın icraçı katibi Armida Salsiah Alişahbana ilə görüşüb. Görüşdə Azərbaycanla UNESCAP arasında əməkdaşlığın hazırkı vəziyyəti və inkişaf perspektivləri müzakirə edilib.
Azərbaycanın regional və beynəlxalq platformalarda artan rolu xüsusi vurğulanıb. Azərbaycanın 2023-cü ildə BMT-nin Mərkəzi Asiya Ölkələrinin İqtisadiyyatları üçün Xüsusi Proqramının (SPECA) 25 illiyinə həsr olunmuş Zirvə görüşünə sədrliyi, həmçinin 2024-cü ildə COP29-a uğurlu ev sahibliyi qeyd olunub.
Görüş zamanı UNESCAP və SPECA regionları arasında gələcək əməkdaşlıq imkanlarına toxunularaq, Orta Dəhliz çərçivəsində əməkdaşlığın strateji əhəmiyyəti vurğulanıb.
Görüşdə həmçinin qarşılıqlı maraq doğuran digər qlobal inkişaflar və çağırışlar ətrafında fikir mübadiləsi aparılıb.
Tərəflər arasında Azərbaycan Respublikası Xarici İşlər Nazirliyinin nəzdində Beynəlxalq İnkişafa Yardım Agentliyi (AIDA) ilə UNESCAP arasında əməkdaşlığa dair Anlaşma Memorandumu imzalanıb.
