2018-04-05
No:080/18, Xarici işlər naziri Elmar Məmmədyarov Birləşmiş Ərəb Əmirliklərinin (BƏƏ) Xarici İşlər üzrə naziri Ənvər Qarqaşı qəbul etdi

Görüşdə Azərbaycan ilə Birləşmiş Ərəb Əmirlikləri arasında əlaqələrin inkişafından məmnunluq ifadə olundu. 

Nazir Elmar Məmmədyarov Azərbaycan Respublikasının tarixən dini və mədəni köklərlə bağlı olduğu ərəb ölkələri, o cümlədən Birləşmiş Ərəb Əmirlikləri ilə əlaqələrin inkişafına və müxtəlif sahələrdə əməkdaşlığın genişləndirilməsinə xüsusi əhəmiyyət verdiyini ifadə etdi.

Birləşmiş Ərəb Əmirliklərinin (BƏƏ) Xarici İşlər üzrə naziri cənab Ənvər Qarqaşı ölkəmizə səfərindən məmnun qaldığını, Azərbaycan və paytaxt Bakının sürətli inkişafının onda böyük təəssürlar doğurduğunu diqqətə çatdırdı. O, Azərbaycanın dinamik inkişafını məmnunluqla izlədiklərini deyərək ölkələrimiz arasında iqtisadi, ticarət, humanitar, turizm və digər sahələrdə əməkdaşlığın daha da inkişaf etdirilməsi üçün əlverişli imkanların olduğunu qeyd etdi. Ə. Qarqaşı Prezident  İlham Əliyev tərəfindən qəbul edildiyini və görüşün çox səmərəli olduğunu, ikitərəfli əlaqələrin bir çox sahələrinin müzakirə edildiyini bildirdi. Qonaq həmçinin, Qoşulmama Hərəkatının nazirlər toplantısının yüksək səviyyədə təşkilinə görə Azərbaycana təşəkkür etdi və ölkəmizin 2019-2022-ci illərdə Qoşulmama Hərəkatına uğurla sədrlik edəcəyinə əminliyini ifadə etdi.  

Nazir Elmar Məmmədyarov yüksək səviyyəli qarşılıqlı səfərlərin iki ölkə arasında əlaqələrin inkişafında mühüm rol oynadığını diqqətə çatdırdı. O, BMT və İslam Əməkdaşlıq Təşkilatı daxil olmaqla, beynəlxalq təşkilatlar çərçivəsində BƏƏ-nin Ermənistan-Azərbaycan Dağlıq Qarabağ münaqişəsi ilə əlaqədar daim nümayiş etdirdiyi ədalətli mövqeyinin, Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyinin dəstəklənməsinin və iki ölkə arasında çoxtərəfli formatlarda əməkdaşlığın yüksək qiymətləndirildiyini nəzərə çatdırdı.


növbəti xəbər əvvəlki xəbər