2017-11-07
No:314/17, Xarici işlər naziri Elmar Məmmədyarov İsveç Krallığına rəsmi səfəri çərçivəsində bu ölkənin xarici işlər naziri xanım Marqot Vallström ilə görüşüb
Görüşdə iki ölkə arasında münasibətlərin hazırkı səviyyəsi, gündəlikdə olan məsələlərə nəzər salındı və yüksək səviyyəli qarşılıqlı səfərlərin əməkdaşlığın genişləndirilməsi baxımından önəmi vurğulandı. Bu il Azərbaycanla İsveç arasında diplomatik münasibətlərin qurulmasının 25 illiyinin qeyd edilməsi məmnuniyyətlə vurğulandı.

Görüşdə Azərbaycan və İsveç arasında iqtisadi əlaqələrin daha da inkişaf etdirilməsi yolları müzakirə edildi və bu xüsusda İsveç şirkətlərinin Azərbaycanda fəaliyyəti təqdir edildi, qarşılıqlı sərmayələrin artırılmasının vacibliyinə toxunuldu. Tərəflər iki ölkə arasında iqtisadi-ticarət əlaqələrinin gücləndirilməsi, o cümlədən ticarət dövriyyəsinin artırılması üçün geniş potensialın olduğunu qeyd etdilər.

Nazirlər Avropa İttifaqı ilə Azərbaycan arasında strateji tərəfdaşlığa dair saziş üzrə aparılan danışıqların hazırkı səviyyəsi ətrafında fikir mübadiləsi apardılar və bu sazişin Avropa İttifaqı ilə Azərbaycan arasında əməkdaşlığın hərtərəfli inkişafına töhfə verəcəyinə inamlarını ifadə etdilər. Tərəflər Avropa İttifaqının Şərq Tərəfdaşlığı ölkələri ilə keçiriləcək Brüssel sammitinə toxundular və gündəlikdə duran məsələlərə dair fikir mübadiləsi apardılar.

Elmar Məmmədyarov, həmçinin, ölkəmizin Avropa İttifaqının üzv ölkələri ilə qarşılıqlı hörmət və anlayışa əsaslanan əməkdaşlığın inkişaf etdirilməsinin tərəfdarı olduğunu bildirdi və 10-a yaxın Aİ üzvü olan ölkə ilə ayrı-ayrılıqda strateji tərəfdaşlığa dair sazişin imzalandığına dair məlumat verdi.

Nazir Azərbaycanın iştirakı və təşəbbüsü ilə həyata keçirilən Şimal-Cənub və Şərq-Qərb nəqliyyat dəhlizləri haqqında məlumat verdi və xüsusilə, Cənubi Asiya ilə Şimali Avropanı birləşdirən Şimal-Cənub dəmir-yol xəttindən İsveçin də faydalana biləcəyini diqqətə çatdırdı.

Ermənistan-Azərbaycan Dağlıq Qarabağ münaqişəsinin həlli üzrə ATƏT-in Minsk Qrupunun həmsədrlərinin vasitəçiliyi ilə aparılan son danışıqlar prosesinə toxunan nazir Elmar Məmmədyarov güc tətbiq edərək dövlətlərin beynəlxalq səviyyədə tanınmış sərhədlərinin pozulması cəhdlərinin qəbuledilməz olduğunu dedi.  Nazir Məmmədyarov həmçinin Avropada və dünyada cərəyan edən mövcud tendensiyalar əsnasında Ermənistan-Azərbaycan Dağlıq Qarabağ münaqişəsi ilə əlaqədar Azərbaycanın mövqeyini təqdim etdi. İsveçin də ATƏT-in Minsk Qrupunun üzvlərindən biri olduğunu deyən Elmar Məmmədyarov BMT Təhlükəsizlik Şurasının müvafiq qətnamələri və Helsinki Yekun Aktı əsasında münaqişənin həllivə Ermənistan qoşunlarının Azərbaycanın işğal olunmuş ərazilərindən çıxarılması üçün bütün Minsk Qrupu üzvlərinin töhfəsinin vacib olduğunu vurğuladı. O, Avropa İttifaqının Qlobal təhlükəsizlik Strategiyasında təsbit olunduğu kimi dövlətlərin suverenliyi və ərazi bütövlüyü kimi təməl prinsiplərə sadiqliyin bütün münaqişələrə münasibətdə qeyri-seçimli əsasda, vahid və birmənalı şəkildə ifadə olunmasının vacibliyini vurğuladı.

Görüşdə həmçinin beynəlxalq təşkilatlar çərçivəsində əməkdaşlıq, qarşılıqlı maraq kəsb edən regional məsələlər ətrafında fikir mübadiləsi aparıldı.


növbəti xəbər əvvəlki xəbər