Azərbaycan Respublikası vətəndaşları üçün Ukraynanın Krım Muxtar Respublikası və Sevostopol ərazilərinə giriş qaydaları

Ukrayna tərəfinin müraciətinə əsasən, Ukrayna Nazirlər Kabinetinin 4 iyun 2015-ci il tarixli, 367 saylı qərarı ilə təsdiq edilmiş “Ukraynanın müvəqqəti işğal olunmuş ərazilərinə giriş və oradan çıxış Qaydaları” diqqətə çatdırılır.

Sözügedən qaydalara əsasən əcnəbilər və vətəndaşlığı olmayan şəxslərin Krım Muxtar Respublikası və Sevostopol ərazilərinə girişi və oradan çıxışı pasport sənədi və Ukrayna Dövlət Miqrasiya Xidməti tərəfindən verilmiş xüsusi icazə ilə nəzarət məntəqələri vasitəsilə həyata keçirilir. Avtomobil yolu xətləri üçün “Kalançik”, “Çaplinka”, “Çonqar” və dəmiryolu xətləri üçün “Xerson”, “Melitopol”, “Vadim”, “Novoalekseyevka” nəzarət məntəqələrindən istifadə olunur.

Xüsusi icazə Ukrayna Dövlət Miqrasiya Xidmətinin ərazi orqanları tərəfindən əcnəbi və ya vətəndaşlığı olmayan şəxsin yaşayış yeri üzrə tərtib edilir.

Xüsusi icazəni almaq üçün əcnəbi və ya vətəndaşlığı olmayan şəxslərdən aşağıdakı sənədlərin təqdim edilməsi tələb olunur:
- ərizə;
- pasport sənədi;
- Ukraynada qanuni əsaslarla yaşadığını təsdiq edən sənəd;
- şəxsi məlumatları əks etdirən sənədin müvafiq səhifəsinin Ukrayna dilinə tərcümə olunmuş surəti;
- Krım Muxtar Respublikası və Sevastopol ərazilərinə giriş məqsədini təsdiq edən sənədlər;
- Ukraynada qalmaq üçün maliyyə təminatının kifayət qədər olduğunu sübut edən sənəd;
- üç ədəd 3,5x4,5 sm ölçülü fotoşəkil.

Krım Muxtar Respublikası və Sevastopol ərazilərinə giriş və oradan çıxış qaydalarını pozan şəxslər Ukraynanın qüvvədə olan qanunvericiliyinə əsasən məsuliyyətə cəlb olunacaqdır.

Qeyd olunanlar ilə əlaqədar olaraq, Krım Muxtar Respublikası və Sevastopol ərazilərinə səfər etmək istəyən Azərbaycan Respublikası vətəndaşlarına yuxarıda bildirilənləri nəzərə almaları və yaranmış hər hansı problemlə bağlı onlara yardım göstərilməsi üçün Azərbaycan Respublikasının Xarici İşlər Nazirliyi və ya Ukraynadakı Səfirliyinə müraciət etmələri tövsiyə olunur.

AZƏRBAYCAN DÜNYA MEDİASINDA DİPLOMATİYA ALƏMİ JURNALİ