2014-05-06
Azərbaycan Respublikasının xarici işlər naziri Elmar Məmmədyarovun Avropa Şurasının Nazirlər Komitəsinin 124-cü sessiyasında çıxışı

Azərbaycan Respublikasının xarici işlər naziri Elmar Məmmədyarovun Avropa Şurasının Nazirlər Komitəsinin 124-cü sessiyasında çıxışı

Vyana, 6 may 2014-cü il

Cənab Prezident,

Zati-aliləri,

Xanımlar və cənablar,

Cənab Sebastian Kurz və onun Vyana və Strasburq şəhərlərindəki komandasını Avstriyanın Avropa Şurasının Nazirlər Komitəsindəki uğurlu sədrlikləri və bu görüşün gözəl Vyana şəhərində yüksək səviyyədə təşkil edilməsi münasibətilə təbrik etmək istərdim.

Baş katibin “Avropada insan hüquqlarının vəziyyəti, qanunun aliliyi və demokratiya” üzrə hesabatı hazırkı vəziyyətin ümumi qiymətləndirilməsi və bizim dəstəklədiyimiz yanaşmanı özündə əks etdirir və nöqsanların aradan qaldırılması üçün mümkün vasitələri təklif edir. Buna baxmayaraq, çox çox diqqətlə nəzərdən keçirilməli hesab etdiyimiz vacib bir məsələni vurğulamağı özümə borc bilirəm: hesabat Avropa Şurasının həll olunmamış münaqişə zonalarında nəzarət mexanizmlərinin, həmin ərazilərə edilən səfərlərdən sonra hesabatvermə prosedurları vasitəsilə gücləndirilməsinin zəruriliyini vurğulayır. Biz bütün Avropada insan hüquqları standartlarının tam şəkildə tətbiqinin təmin olunmasının əhəmiyyətini və münaqişə zonalarında məskunlaşmış əhalinin müdafiəsinin zəruriliyini anlayırıq. Lakin bu müddəa müvafiq üzv ölkələrin ərazi bütövlüyünə zidd olaraq asanlıqla sui-istifadə və manipulyasiya edilə bilən bir vəziyyətə gətirib çıxara bilər. Məhz bu səbəbdən biz, mürəkkəb həll prosesini daha da çətinləşdirə biləcək bu kimi həssas məsələlərdə son dərəcə ehtiyatlı olmalıyıq.

Qonşu Ermənistanın işğalla müşayiət olunan və davam edən təcavüzündən və Azərbaycan Respublikasının beynəlxalq səviyyədə tanınmış ərazilərində törədilmiş etnik təmizləmədən əziyyət çəkən dövlət kimi Azərbaycanın möhkəm və qəti mövqeyi ondan ibarətdir ki, Avropa Şurasının nümayəndələrinin və onun monitorinq mexanizmlərinin münaqişə zonalarına səfərləri yalnız aidiyyəti dövlətin açıq-aydın razılığı əsasında həyata keçirilə bilər. Əks təqdirdə, bu səfərlər beynəlxalq hüququn normaları ilə ziddiyyət təşkil edəcək və qeyri-leqal addım kimi qiymətləndiriləcəkdir.

Cənab Sədr,

Azərbaycan ardıcıl olaraq çoxsaylı demokratik islahatları uğurla həyata keçirərək Avropa Şurasına daxil olma prosesində üzərinə götürdüyü öhdəlik və tələbləri həyata keçirmişdir. Əminik ki, yeni qəbul olunmuş və tezliklə, Baş katibin Bakıya səfəri zamanı başlanacaq 2014-2016-cı illər üçün Avropa Şurası-Azərbaycan Fəaliyyət Planı, gələcək illərdə Azərbaycan ilə Avropa Şurası arasında uğurlu əməkdaşlıq üçün digər əhəmiyyətli alət olacaqdır.

Yekun olaraq qeyd etmək istərdim ki, Azərbaycan növbəti 6 ay ərzində Nazirlər Komitəsinə sədrlik etmək hüququna malik olacaqdır. Sədrliyimiz müddətində, yarandığı ildən bəri Avropa Şurası məqsədlərinin gələcəkdə inkişaf etdirilməsində əlimizdən gələn səyləri əsirgəməyəcəyik. Bu məqsədlə, biz bu günorta daha təfərrüatlı şəkildə təqdim edəcəyim sədrlik prioritetlərimizi müəyyən edərkən təşkilatın hazırkı siyasi gündəliyini və üzv dövlətlərin qarşılaşdığı təhdidləri nəzərə almışıq.

Diqqətinizə görə minnətdaram.

növbəti xəbər əvvəlki xəbər