2014-09-23
XİN-in Mətbuat xidmətinin rəhbəri v.i.e Hikmət Hacıyevin Ermənistanın xarici işlər naziri Eduard Nalbəndyanın Şotlandiyada keçirilmiş referendum ilə əlaqədar söylədiyi fikirlərə dair şərhi

Azərbaycan beynəlxalq hüququn prinsiplərindən olan xalqların öz müqəddəratını təyin etməsinə və öz iradəsini ifadə etməsinə hörmətlə yanaşır. Amma xalqların öz müqəddəratını təyin etməsi işğal, təcavüz və qanlı etnik təmizləmə əsasında və mərkəzi hökumətin icazəsi olmadan həyata keçirilə bilməz. Eləcə də onun ifadəsi dövlətlərin ərazi bütövlüyünə xələl gətirməməlidir.  

Ermənistan tərəfindən beynəlxalq hüququn norma və prinsipləri və BMT nizamnaməsi kobud şəkildə pozularaq, Azərbaycan Respublikasına qarşı hərbi təcavüz edildiyi və ərazilərinin 20 faizi işğal olunduğu, bir milyondan artıq azərbaycanlı öz doğma torpaqlarından qovularaq qaçqın və məcburi köçkün halına salındığı, işğal olunmuş ərazilərdə mülki Azərbaycan əhalisinə qarşı insaniyyətə qarşı cinayətlər və qanlı etnik təmizləmə törədildiyi halda, Ermənistan-Azərbaycan münaqişəsi kontekstində E.Nalbəndyanın insan hüquqları, demokratik azadlıqlar və xalqların öz müqəddəratından danışmağa siyasi, hüquqi və mənəvi haqqı yoxdur. Çünki bu prinsipin əsasını təşkil edən zəmin tam şəkildə pozulmuşdur. Ermənistanın halında xalqların öz müqəddəratını təyin etmək prinsipinin bəhanə gətirilməsi Azərbaycana qarşı törədilmiş işğal və təcavüzə görə Ermənistanın daşıdığı məsuliyyətin uğursuz formada pərdələnməsi və haqq qazandırılması cəhdidir.

Ermənistan xarici işlər nazirinə xatırlatmaq istərdik ki, Helsinki Yekun Aktında bərabər hüquqlar və xalqların öz müqəddəratından bəhs edilərkən, BMT nizamnaməsinin məqsəd və məramlarına, beynəlxalq hüququn norma və prinsiplərinə, xüsusilə də dövlətlərin ərazi bütövlüyünə hörmət edilməsi tələb olunur. Eyni zamanda zor tətbiq edərək dövlətlərin beynəlxalq səviyyədə tanınmış sərhədlərinin dəyişdirilməsi cəhdlərinin qəbuledilməzliyi Helsinki Yekun Aktında təsbit olunmuşdur.

Münaqişənin həlli üçün əsas maneə Ermənistan silahlı qüvvələrinin işğal edilmiş Azərbaycan ərazilərində fiziki mövcudluğudur. Ermənistanın işğalçı qüvvələri Azərbaycan ərazilərindən çıxarıldıqdan və azərbaycanlı qaçqın və məcburi köçkünlər öz doğma yurdlarına qayıtdıqdan, kommunikasiyalar və etimad mühiti bərpa edildikdən sonra Azərbaycan Respublikasının Dağlıq Qarabağ regionunun azərbaycanlı və erməni icması Azərbaycanın sərhədləri daxilində öz müqəddəratını müəyyən edə bilər. Etimad tədbirləri də ilk növbədə Ermənistan silahlı qüvvələrinin işğal olunmuş Azərbaycan ərazilərdən çıxarılması ilə başlamalıdır.

Rəsmi Yerevan yalan və iftiralarla öz xalqını və beynəlxalq ictimaiyyəti aldatmaq cəhdlərinə və təxribatçı əməllərə son qoymalı, konstruktiv və sivil qaydada münaqişənin həlli istiqamətində konkret addımlar atmalıdır.

növbəti xəbər əvvəlki xəbər